I Fortun finn du vårt besøkssenter for nasjonalparkane Jotunheimen og Breheimen. Kom inn til oss og finn inspirasjon til å dra ut og utforske området. Her kan du oppleve utstillinga Fjelliv, få informasjon, kunnskap og innsikt. Vi har også ein koseleg kafé og eit spanande uteområde.
Kven var dei fyrste som våga seg opp på tindane i Hurrungane? Korleis har folk i området levd med og av fjellet gjennom historia? Og kvifor er det så viktig å ta vare på villreinen som vandrar i nasjonalparkane? Dette er noko av det du finn svar på i Fjelliv. Her kan du også sjå Ole Marius Jørgensen sine kunstfotografi som foreinar notid og fortid i store visuelle opplevingar.
Krukla er uteområdet vårt der borna kan leike og finne sin indre Slingsby i klatreveggen. Vi har bålpanne, leikestativ og gapahuk der ein kan sitje tørt på våte dagar.
Besøkssenteret er eit flott utgangspunkt for lokale uteopplevingar. Vi gjev deg tips til turar og aktivitetar på alle slags nivå. Dette er også startpunktet for ei flott kulturhistorisk vandring til høgdegarden Fuglesteg.